Mark 5

Izesu' Gelasa Vetida Vo Sikalahu' Goloso nGimiselo Huline'

(Mataio' 8:28-34; Luka' 8:26-39)

1Ne'mine ogavo ingine noso ohuno helala Gelasa vetida vi hetelani'. 2Vi hetelikevo Izesu' sipiuti' lemavo sikalahu' golososi minive mali'mo gonoso mili-ngidaa' ani' geheni muli' ebekuti' ogo navo votene' asine'. 3A'mine ve nene geheni muliku' ongo minaa' neivo ve mali'mosi analo' damiline' ogavo seni nalatunukisi dani' nene damine' ve. 4Gamene muki' gizene analo' seni nala' izi-dani'za analo' nala' nene do huko hulo gizenelo' nala' nesi izo huko hulavo ve hamoli'mosi amuzo molo ivile' ogo do hongu lo-damilido' o minine'. 5Gamene gamene holuka' holuka' geheni mulikukisi gololokisi mino geke' geke' lo mino gehenitunu' gesebe' izo asi've oko'no nene huko minaa' ine'.

6Izesu' aza hoto' navo ningo loti' izo ogo gizeneu' gubi' ize emo 7amuzo molo geke' naba lo ti' lo lo-imine': Izesuvo, O'moso dizo minive'mi gipele mene gaza nouvoda naniteka' nane. O'moso'mi gulivelo' agae lo nolo-gimuze. Mulumo gono nemamozo. 8Mene gamazi line' nene Izesu' aza sikalahu' goloso gaza a'mine ve'mi lulouti' lemo vozo lo nolo-divosa line'. 9Lavo Izesu' aza longo' o-do ti' lo line': Guliveka zaho nane. Longo' o-davo aza line': Laza vai' nounako gulive'ne nene Mangilise' nouve. 10Ne'mine lo mene misuboukoti' limiselo mala do hulo-ledamilive lo amuzo molo zege' zegeka line'. 11Ido' a'mida golola nene ize vai' goloso galese ni nizavo 12sikalahu' golosolite zege' zegeka li ti' li li-imani': Agae. Izeu' volene do hulo-ledanivo lu'ningu' dizelone. 13Ne'mine likevo vi a'mingu' dizilizave lo Izesu' gele ngimine'. Ne'mine ogavo sikalahu' goloso ingine a'mine ve'mi lulouti' limi izeliti lu'ningu' vi dizani'. Dizikevo ize tu tauseni (2,000) ne'mine ingine mangilise hizi loti' izi golo aveselo' nene limi noso ohunou' vi noso ni hilani' ve.

14Hilikevo ize gizebo ve nete golise vi tauni nabaukisi ido' hazalasi vetete' igi li-ngimikevo evenelite soto' ine' inite' nene ningelone li 15Izesuda igi sikalahu' goloso mukikisi minive nene genegana do otuho gala gele nge losa neivo ningi ngehelele izine'. 16Ido' a'mine sikalahu' goloso muki' minivelasi ido' izelasi soto' ine' inite' ningave nete ne'mi gamazi've nene vetete' igi li-ngimikevo 17engi' misubo'ine nene hulo vilive li Izesu'ni geligelinga li-dani'.

18Ne'mine li-dikevo Izesu' sipi mau' nodizivo sikalahu' golososi minive aza ezela gi'mizo monelove lo geligelinga lo lo-imine'za 19Izesu' o've lo-emo ti' lo lo-imine': Gaza numungala vo Guvelesi ve gezemu' muluno hukavo inite' lamine' goloso o-gidine' ne'mi gamazi nene vetete' ogo geze eveneka zuho lo-ngemezo. 20Lavo Dekapoli misubouko vo Izesu' inite' o-dingumu' nene lo soto' ogo lo-ngemavo evene' muki' gili golize lani'.

Izesu' Zailo' Aluvosi Genegana'velo' Do Giline' Venekisi Do Lamine' O-ngidine'

(Mataio' 9:18-26; Luka' 8:40-56)

21Ne'mine ikevo Izesu' aza sipiu' dizo noso ohuno ema helala gohi ogo noso gaheve gepelo' neivo evene' muki' goloso ezela igi di gese' ani'. 22Ne'mine ikevo Zuda veti mono' numunguti' guvelesi ve ma gulive Zailo' aza ogo Izesu'ni ningo gizeneu' gubi' ize emo 23agae lo geligelinga lo ti' lo lo-imine': Neni' alune ngomo ma nene mo osu' lolosa neize. Aza nene lamine' ogo velesi lamine' ha minelingumu' ve lo gaza ogo angadunu' do geleline lo nouve. 24Lo-emavo maka' nivasivo evene' vai' li e'meti nivii ezela giki' giki' igi minani'.

25Ne'mine igi nivangu' nene vene' ma vine'. A'mine vene' nene venelite ike'nilo' ike'nilo' ningaa' nani' siki nene mate-desa'mivo mino gamene ha'nalo' ninge do vo neivo 26kilisimasi tuvelu ogo vine' ve. Ne'mino neivo luso ve muki' nete di lamine' i-dilisa luso gizi-dangu' nene mulumo nite' muki' imi luso gizi-dikevo a'mido' nene meni ngemo inite've muki' hulo osu' line'za isine' nite' nene osu' lo-damo gohi do naba ogo minine' ve. 27A'mine vene' nene Izesu' guvele gelosa naza oko'nolo' damo ha genegana'velokovo' do geleloni' nene lamine' olosuve lo giline' nenako nemu' aza evene' giki' igi minangu' nene Izesu' mehenelati' ogo 29anadunu' genegana'velo' do giline'. Do nogilivo a'mido' geto siki inite've minine' nene oku' lo-davo ti' lo lulou' giline': Nisine' nite' nene mo osu' lo-nedave. 30Ne'mine ogavo Izesu' aza ezelati' amuzo vine' nene ei' lulouko gelosa a'mine evene' muliseu' nene lite' lo mine velepe' izo ti' lo line': Genegana'nelo' evene' zaho do gelane. 31Lavo izipahala zuho ingine ti' li li-imani': Evene' muki' nene gei' di vodo vodo i-gidi oko'nido' oko'nido' igi nivanako nenito' zaho do gilive lo nolabe. 32Lani'za aza nene zaho do gilive lo ningelesa vele do eza ema ogo ninge'mo monine'. 33Ninge'mo nomonivo vene' aza eita soto' o-dine' inite' mamu' gelosa golise gelo luvoluvo izo ogo Izesu' gizeneu' lemo pou' lo ongo gubi' ize emosa ei' ine' inite' nemu' nene hitamo lo soto' ogo osu' line'. 34Lo-emavo aza ti' lo lo-imine': Alune ve, gaza gele ele'vole' anidi'mo nene lamine' ogange. Mulungau' hongu lo lamine' o minivo vozo. Inite' gisine' nene osu' lo-gedavo lamine' minezo.

35Ti' nolivo a'mine mono' numunguti' guvelesi ve'mi numu'velati' ma igi ti' li lani': Aluva ma mo helave. Nemu' nene gaza tisa'ni lihiteheka lo gohi ele'mizo amozo. 36Ne'mine lani'za Izesu' a'mine gamazi gele hulo mono' numunguti' guvelesi vemu' ti' lo lo-imine': Gaza gopo gaka gelamo nenikumu' gele ele'vole' ogovo' minezo. 37Ti' lo losa e'metikelizave lo evene' mukikumu' nene o've lo lo huko-ngedo Petolole Zakobole Zakobo' akunolo Zohanelesi engikovo' o've lo-ngedamivo e'metani'. 38Mono' numunguti' guvelesi ve'mi numudo' vi hetelikevo alungomu' gulugulunga li ive nama igi zanamana izi nizavo ningine'. 39Ningo numungu' dizo ti' lo lo-ngimine': Lingine nanimu' ngeunga li ive nama igi nizave. Izipe nene helamine' haza okise ongo neive line'. 40Lavo gize' i-dani'za aza muki' ngimisele hulo heto' ogo izipe'mi melehingi izelehingi ido' ezesi ave nesi ngele'mizo izipe minine' numungu' dizine'. 41Dizo alungo ne'mi analo' do ti' lo lo-imine': Talita kumi, ne'mi monovo leli' gamaziti' nene ti' lo neive: Alungo ngomo, neni' nolo gimuze. Otezo. 42Lavo a'mido' geto oto aka mono minine'. A'mine alu'mi kilisimasi've nene tuvelu ne'mine minine'. Ne'mine ogavo ningave ingine a'mido' geti golize goloso li minani'. 43Ti' igi nizavo Izesu' aza a'mine ningani' initekumu' nene evene' hamokisi li-ngimamilo lo lo huko lo-ngemo alungo nene noso' nite' imilizave lo lo-ngimine'.